«Lester»ning tailandlik egalari klubni sotish imkoniyatlarini o‘rganmoqda.
Financial Times xabariga ko‘ra, King Power kompaniyasi ehtimoliy xaridorlarni muhokama qilish uchun Citigroup (AQSHdagi moliyaviy konglomerat) investisiya bankirlari bilan bog‘langan. Klub hozircha bu vaziyatga izoh bermayapti.
2016 yilda «Lester» Klaudio Ranyeri boshchiligida Premyer-liga chempionligini qo‘lga kiritgan edi. 2026 yilda esa jamoa Chempionshipdan ham chiqib ketdi. O‘tgan mavsumda 2023/24 yilgi mavsumdagi moliyaviy qoidalarni buzgani uchun klubdan 6 ochko olib tashlangan edi.
Joriy yilda e’lon qilingan hisobotlar shuni ko‘rsatdiki, klubning Premyer-liganing 2024/25 yilgi mavsumidagi zarari 71,1 million funtni tashkil etgan. Klub egalari o‘tgan yili 124 million funtlik aksionerlik so‘mlarini (zayomlarini) hisobdan chiqarib, qarzni aksionerlik kapitaliga aylantirgan edi.
Amaldagi egalari klubni Sigreyvdagi ko‘p millionlik mashg‘ulot bazasiga ko‘chirishgan va stadionni kengaytirish imkoniyatini ko‘rib chiqishayotgan edi, ammo uchinchi divizionga tushib ketish ushbu rejalarni to‘xtatib qo‘ydi.
King Power’ning asosiy biznesi koronavirus pandemiyasidan so‘ng Tailandga keluvchi sayyohlar, ayniqsa Xitoydan keluvchilar sonining kamayishi sababli zarar ko‘rdi.
