«Barselona» yarim himoyachisi Mark Kasado ushbu yozgi transfer oynasi yopilgunga qadar Kataloniya klubini tark etish ehtimoli saqlanib qolmoqda. Bu haqda insayder Fabrisio Romano xabar berdi.
Yaqin kunlarda «Barselona» rahbariyati va futbolchining agenti Jorje Mendesh o‘rtasida uchrashuv o‘tkazilishi va unda yarimhimoyachining jamoadagi mavqei hamda kelajakdagi eng maqbul variantlar muhokama qilinishi kutilmoqda.
Kasadoga Yevropaning bir qator top-klublari, shuningdek, Saudiya Arabistoni jamoalari tomonidan jiddiy qiziqish bildirilmoqda. Agar 22 yoshli futbolchi jamoani tark etishga qaror qilsa, unda bir nechta manfaatli variantlar mavjud.
Hozircha yakuniy qaror qabul qilingani yo‘q. Barcha tomonlar kelib tushgan takliflarni hamda «Barselona»ning yangi mavsum uchun rejalarini atroflicha baholagach, akademiya tarbiyalanuvchisi klubda qolishi yoki faoliyatini boshqa jamoada davom ettirishiga aniqlik kiritiladi.
