«Bolonya»ning markaziy himoyachisi Djon Lukumi faoliyatini Italiyaning boshqa klubida davom ettirishi mumkin. Bu haqida insayder Nikolo Skira o‘zining ijtimoiy tarmoqlarida xabar bermoqda.

Manba ma’lumotlariga ko‘ra, 28 yoshli kolumbiyalik futbolchini «Komo» o‘z safiga qo‘shib olmoqchi. Klub rahbariyati himoyachi uchun 22 million yevro taklif qilishni rejalashtirmoqda. Lukumining o‘zi ham ushbu yozda jamoasini almashtirishga tayyor.

Kolumbiyalik futbolchi 2022 yilning avgustidan beri «Bolonya» safida to‘p surib kelmoqda. Tomonlar o‘rtasidagi amaldagi shartnoma 2027 yilning iyun oyi oxirida yakuniga yetadi.

A Seriyaning o‘tgan mavsumida Lukumi 29 ta o‘yinda maydonga tushib, 1 ta gol urdi va 5 ta sariq kartochka oldi.