«Andijon» hamda «Paxtakor» (0:0) bahsidan so‘ng «Paxtakor» ustozi Kamoliddin Tojiyev matbuot anjumanida qatnashdi.

— O‘yin qiyin bo‘lishini bilardik. Yigitlarga tushuntirgandik. Futbolchilar o‘z saviyasida o‘yin ko‘rsatishdi. Butun bahs davomida yaxshi o‘yin namoyish etdik. Gol urdik, hisoblanmadi. G‘alaba qozonishimizga yo‘l qo‘yishmadi. «Andijon» jamoasi emas, bunday o‘ynash qiyin.

— «Andijon» jamoasi emas, deb aytdingiz. Buni to‘liqroq izohlab bera olasizmi?

— O‘zlari bilishadi, ko‘rganlar ham bilishadi. «Andijon» yaxshi jamoa. Lekin bugun biz ochko yo‘qotdik. Biz uchun har bir ochko juda muhim.

— Matbuot anjumanlarida doim o‘yinchilar haqida to‘liq ma’lumot berib kelgansiz. Rustam Turdimurodovning «Andijon»ga o‘tishi qanchalik haqiqat?

— Bilmayman, bu haqda eshitmaganman. Bu gap qayerdan chiqdi, bilmayman!

— Qaydnomadan o‘rin olmagan Hojimat Erkinov va Hojiakbar Alijonovda jarohat bor edimi?

— Hojimat shu yerda edi, tiklana olmadi. Kichik jarohati bor. Alijonovda ham biroz jarohat bor.

— Qizil kartochka ko‘rsatilgan vaziyatga izoh bera olasizmi?

— Ko‘rib chiqishimiz kerak. Ko‘rmasdan turib gapira olmaymiz. Ko‘rganimizdan keyin aytish mumkin.

— «Paxtakor» chempionlik uchun kurashyapti. Bugungi durang jamoangizning chempionlik yo‘lidagi imkoniyatlariga qanchalik ta’sir qiladi?

— Hali chempionatning yarmi oldinda. Oldinda ikkinchi davra turibdi, ko‘p o‘yinlar bor. Hozir hamma ochko yo‘qotyapti. Barcha jamoalar kuchli, yengil bo‘lmaydi. Baribir biz oxirigacha kurashamiz. Oldimizda maqsadimiz bor. Faqat keyingi o‘yinlarni yutishga harakat qilamiz.