Portugaliyaning «Braga» klubi va Chexiya terma jamoasi darvozaboni Lukash Gornichek «Nyukasl»ga o‘tishga juda yaqin turibdi. Sky Sports nashrining xabar berishicha, 24 yoshli posbon Angliya klubiga transfer qilinishi oldidan Ispaniyada tibbiy ko‘rikdan o‘tib bo‘lgan.
Manbaning ta’kidlashicha, transfer haqida yaqin orada rasman e’lon qilinadi. «Nyukasl» golkiperning «Braga» bilan shartnomasida ko‘rsatilgan tovon puli (30 million yevro) haqidagi bandni faollashtirgan. Gornichek «Nyukasl»ning yangi asosiy darvozaboniga aylanadi.
Darvozabon «Braga»ga 2019 yilning yozida Chexiyaning «Pardubise» klubidan o‘tgan edi. O‘tgan mavsumda u jamoa safida barcha turnirlarda 55 ta o‘yinda maydonga tushib, 51 ta gol o‘tkazib yubordi. Uning hisobida 24 ta «quruq» o‘yin bor.
