Португалиянинг «Брага» клуби ва Чехия терма жамоаси дарвозабони Лукаш Горничек «Ньюкасл»га ўтишга жуда яқин турибди. Sky Sports нашрининг хабар беришича, 24 ёшли посбон Англия клубига трансфер қилиниши олдидан Испанияда тиббий кўрикдан ўтиб бўлган.

Манбанинг таъкидлашича, трансфер ҳақида яқин орада расман эълон қилинади. «Ньюкасл» голкипернинг «Брага» билан шартномасида кўрсатилган товон пули (30 миллион евро) ҳақидаги бандни фаоллаштирган. Горничек «Ньюкасл»нинг янги асосий дарвозабонига айланади.

Дарвозабон «Брага»га 2019 йилнинг ёзида Чехиянинг «Пардубице» клубидан ўтган эди. Ўтган мавсумда у жамоа сафида барча турнирларда 55 та ўйинда майдонга тушиб, 51 та гол ўтказиб юборди. Унинг ҳисобида 24 та «қуруқ» ўйин бор.