«Sevilya» Madridning «Real» klubi darvozaboni Fran Gonsales transferini rasman e’lon qildi. Andalusiya klubi matbuot xizmati xabariga ko‘ra, 21 yoshli darvozabon 2031 yilning 30 iyunigacha mo‘ljallangan shartnomaga imzo chekdi. Tomonlar bitimning moliyaviy shartlarini oshkor qilishmadi.

Shu bilan birga, Ispaniya OAV avvalroq «Real» bu transferdan taxminan uch million yevro olishi haqida xabar bergan edi. Bundan tashqari, Madrid klubi futbolchining iqtisodiy huquqlaridan 50 foizini o‘zida saqlab qoladi va shartnomaga uni qayta sotib olish opsiyasini ham kiritadi.

Fran Gonsales 2022 yilning yozida «Real» futbolchisiga aylangan va klub tizimi orqali asosiy jamoagacha bo‘lgan yo‘lni bosib o‘tgan. Golkiperning asosiy tarkibdagi debyuti 2024/25 yilgi mavsumda «Valensiya»ga qarshi o‘yinda bo‘lib o‘tgan edi.