«Santos» hujumchisi Neymar professional futbolchilik faoliyatini yakunlash ehtimoli haqida fikr bildirdi.

«Men faoliyatni yakunlash haqida o‘ylamayapman. «Santos» bilan shartnomam dekabrgacha mo‘ljallangan, men klub uchun qo‘limdan kelgan barcha ishni qilishni xohlayman. Shundan so‘ng o‘z variantlarimni ko‘rib chiqaman. Qolish, ketish, faoliyatni yakunlash, o‘ynashda davom etish... Bilmayman! Dekabrgacha hali vaqt bor. Ko‘ramiz», — dedi Neymarning so‘zlarini jurnalist va insayder Fabrisio Romano X ijtimoiy tarmog‘ida keltirib.

Eslatib o‘tamiz, Neymar qadrdon «Santos» klubiga 2025 yilda qaytgan edi, uning shartnomasi joriy yilning dekabr oyi oxirigacha amal qiladi. 2026 yilda hujumchi jamoa tarkibida 16 ta o‘yinda maydonga tushib, 8 ta gol urishga erishdi. «Santos»dan tashqari, Neymar faoliyati davomida «Barselona», «PSJ» va «Al-Hilol» klublarida to‘p surgan.