Madridning «Atletiko» klubi himoyachisi Matteo Rudjeri «Aston Villa»ga o‘tishga yaqin turibdi.

Marca ma’lumotlariga ko‘ra, Ispaniya va Angliya klublari transfer bo‘yicha kelishuvga erishib bo‘lishgan. Bitim summasi 18 million yevroni tashkil etadi, yana 6 million yevro esa bonuslar ko‘rinishida nazarda tutilgan. O‘tishni yakunlash uchun futbolchining o‘z roziligini olish qoldi, xolos.

Qayd etilishicha, 23 yoshli italiyalik futbolchi «Atletiko» bilan birga Janubiy Koreyadagi mavsumoldi turnesiga uchib ketmagan, chunki u o‘z kelajagi bo‘yicha qarorni kutmoqda. Avvalroq himoyachiga «Yuventus» va «Roma» klublari ham qiziqish bildirgan edi.

Rudjeri Madrid jamoasi safida 2025 yildan beri o‘ynab kelmoqda. U klub safida 47 ta o‘yin o‘tkazib, yettita golli uzatmaga mualliflik qilgan.