Braziliyalik qanot hujumchisi Vinisius Junior «Real» bilan shartnomasini uzaytirganidan so‘ng o‘z fikrlari bilan o‘rtoqlashdi. Klub va futbolchi o‘rtasidagi yangi kelishuv 2032 yilning yoziga qadar amal qiladi.

«“Bernabeu”dagi sakkiz yil — juda kam... Yana olti yil va abadiy, “Real” Madrid», — deb yozdi Vinisius o‘zining ijtimoiy tarmoqdagi sahifasida.

Shuningdek, qanot hujumchisi shartnomasi uzaytirilgani haqida alohida post ham e’lon qildi. Avvalroq u o‘z sahifasidan «Real» haqidagi barcha eslatmalarni o‘chirib tashlagan edi.

Vinisius 2018 yilning yozidan buyon «Real» sharafini himoya qilib kelmoqda. U Madrid klubiga Braziliyaning «Flamengo» jamoasidan 45 million yevro evaziga ko‘chib o‘tgan.

O‘tgan mavsumda Vinisius «Real» safida 53 ta uchrashuvda ishtirok etib, 22 ta gol urdi va 14 ta golli uzatmani amalga oshirdi.