Urugvay futbol assosiasiyasi rasmiy saytida Diyego Forlanning terma jamoaga qaytganini e’lon qildi. 47 yoshli urugvaylik mutaxassis ham yoshlar, ham asosiy milliy terma jamoaning bosh murabbiyiga aylanadi.
Forlan ushbu lavozimda Marselo Byelsaning o‘rnini egallaydi. Yangi bosh murabbiyning ilk taqdimot marosimi dushanba, 10 avgust kuni bo‘lib o‘tadi.
«Forlan o‘zi o‘chirib bo‘lmas iz qoldirgan maskanga qaytmoqda. O‘rnak olarli timsol, unutilmas avlod ramzi hamda 2010 yilgi Jahon chempionatining eng yaxshi futbolchisi endi murabbiy sifatida o‘z tajribasi, yetakchilik qobiliyati va xalqaro futbol bo‘yicha chuqur bilimlari bilan bo‘lishish uchun qaytmoqda», — deyiladi rasmiy bayonotda.
Forlanning murabbiylar shtabidan Santyago Espasandin va Diyego Peres (yordamchilar), Marko Mansulino (jismoniy tayyorgarlik bo‘yicha murabbiy), Ignasio Bordad (darvozabonlar murabbiyi) hamda Gabriel Skriles (videoanalitik) o‘rin oladi.
Uning milliy terma jamoadagi ilk sinovi sentyabr-oktyabr oylarida, Urugvay FIFA shafeligida o‘rtoqlik o‘yinlari o‘tkazadigan paytda bo‘lib o‘tadi. Bu mamlakatning eng buyuk afsonalaridan biri boshchiligidagi yangi davrning boshlanishi bo‘ladi.
Jahon chempionati-2026 turnirida Urugvay terma jamoasi guruhdan chiqa olmagan edi. Jamoa Saudiya Arabistoni (1:1) va Kabo-Verde (2:2) bilan durang o‘ynab, Ispaniyaga (0:1) imkoniyatni boy bergan holda 2 ochko jamg‘argan.
