«Chelsi» o‘ng qanot himoyasida o‘yinchilar ko‘payib ketgani sababli Malo Gyustoni sotishga tayyor, deb xabar beradi RMC Sport.

Manba ma’lumotlariga ko‘ra, London klubi italiyalik Marko Palestra uchun 50 million yevrodan ortiq mablag‘ sarflab, u bilan 2031 yilgacha shartnoma imzolagan holda asosiy urg‘uni unga qaratmoqda. Bundan tashqari, Ris Jeyms sog‘lom bo‘lgan paytda jamoa sardori va asosiy o‘ng qanot himoyachisi bo‘lib qolaveradi. Shu sababli, loyiq taklif tushsa, klub Gyustoni qo‘yib yuborishga tayyor.

Ta’kidlanishicha, 23 yoshli fransuzga Yevropaning bir nechta grand klublari qiziqish bildirmoqda, ammo hozircha hech kim rasmiy taklif bilan chiqmagan. Xaridorlarni «Chelsi» talab qilayotgan summa — 75 million funt sterling cho‘chitmoqda. Ko‘pchilik bu narxni haddan tashqari oshirib yuborilgan deb hisoblaydi.

Futbolchiga qiziqayotgan jamoalar orasida «Manchester Siti» ham bor, biroq «shaharliklar» buncha pul to‘lashga tayyor emas. Shuningdek, «Pari Sen-Jermen»ning qiziqishi haqidagi xabarlar asossiz ekani, Parij klubi o‘ng qanot himoyachisi qidirmayotgani aytilmoqda.

Gyustoning «Chelsi» bilan amaldagi shartnomasi yana uch yilga mo‘ljallangan.