«Челси» ўнг қанот ҳимоясида ўйинчилар кўпайиб кетгани сабабли Мало Гюстони сотишга тайёр, деб хабар беради RMC Sport.

Манба маълумотларига кўра, Лондон клуби италиялик Марко Палестра учун 50 миллион евродан ортиқ маблағ сарфлаб, у билан 2031 йилгача шартнома имзолаган ҳолда асосий урғуни унга қаратмоқда. Бундан ташқари, Рис Жеймс соғлом бўлган пайтда жамоа сардори ва асосий ўнг қанот ҳимоячиси бўлиб қолаверади. Шу сабабли, лойиқ таклиф тушса, клуб Гюстони қўйиб юборишга тайёр.

Таъкидланишича, 23 ёшли французга Европанинг бир нечта гранд клублари қизиқиш билдирмоқда, аммо ҳозирча ҳеч ким расмий таклиф билан чиқмаган. Харидорларни «Челси» талаб қилаётган сумма — 75 миллион фунт стерлинг чўчитмоқда. Кўпчилик бу нархни ҳаддан ташқари ошириб юборилган деб ҳисоблайди.

Футболчига қизиқаётган жамоалар орасида «Манчестер Сити» ҳам бор, бироқ «шаҳарликлар» бунча пул тўлашга тайёр эмас. Шунингдек, «Пари Сен-Жермен»нинг қизиқиши ҳақидаги хабарлар асоссиз экани, Париж клуби ўнг қанот ҳимоячиси қидирмаётгани айтилмоқда.

Гюстонинг «Челси» билан амалдаги шартномаси яна уч йилга мўлжалланган.