«Chelsi» tarkibida 10 nafar tajribali markaziy himoyachi bo‘lishiga qaramay, klub ushbu yozda yana bir himoyachini sotib olishi mumkin. Insayder va jurnalist Ben Yakobsning so‘zlariga ko‘ra, bu transfer faqat ma’lum bir shart bajarilgan taqdirdagina amalga oshadi.
CFCHub Twitch strimida chiqish qilgan Yakobsning ma’lum qilishicha, yangi himoyachi xaridi Trevo Chalobaning «Komo»ga transferidan tashqari, Aksel Disasi, Benua Badiashil va Tosin Adarabiololarning ham jamoani tark etishiga bog‘liq.
Ammo yangi himoyachi olish hozirda klub uchun ustuvor vazifa emas. Asosiy e’tibor yangi futbolchi xarid qilishga emas, balki yuqorida nomlari tilga olingan o‘yinchilarni sotib yuborishga qaratilgan.
Hatto ushbu to‘rt futbolchi jamoani tark etgan taqdirda ham, «Chelsi» ixtiyorida Maksans Lakrua, Levi Kolvill, Uesli Fofana va Josh Achimpong qoladi. Bu esa yevrokuboklarsiz o‘tadigan mavsum uchun to‘liq yetarli hisoblanadi.
