«PSJ» Mika Godts bo‘yicha «Ayaks»ga yuborgan 40 million yevrolik dastlabki taklifi rad etilganiga qaramay, Amsterdam klubiga yangi va yaxshilangan taklif bilan chiqishni rejalashtirmoqda.

Telegraaf nashrining xabar berishicha, parijliklar «Ayaks» bilan kelishuvga erishish uchun 50–55 million yevro atrofidagi yangi taklifni tayyorlashmoqda.

Yevropa chempionlari belgiyalik iqtidorli vinger bilan shaxsiy shartnoma shartlarini kelishib olgach, ushbu transferni yakunlashlariga ishonch bildirishmoqda. Erediviziya grandi esa avvalroq Godtsni faqatgina mos narx evaziga sotishlarini ma’lum qilgan edi.

21 yoshli futbolchi «PSJ»da Bredli Barkolaning o‘rnini bosuvchi nomzod sifatida ko‘rilmoqda.

Muvaffaqiyatli kechgan 2025/26 yilgi mavsumdan so‘ng, Godts yangi mavsumda «Ayaks»ning Konferensiyalar Ligasi saralash bosqichidagi 3 ta o‘yinida 1 ta gol urib, 2 ta golli uzatmaga mualliflik qildi va ajoyib sport formasida ekanini ko‘rsatmoqda.