«Real»ning sobiq hujumchisi Fernando Moryentes El Partidazo de COPE ko‘rsatuvi efirida «Manchester Siti» yarim himoyachisi Rodri atrofidagi vaziyatga munosabat bildirib, Madrid klubi rahbariyatini tanqid qildi.

Uning fikricha, «qirollik klubi» aslida ispaniyalik yarim himoyachini sotib olish uchun yetarlicha harakat qilmagan va endi aybni futbolchining «Barselona» uslubini tanlaganiga ag‘darishga urinmoqda.

«Bu shunchaki hazil. Bizni ahmoq o‘rnida ko‘rishmoqda. Ochiq-odin ko‘rinib turibdiki, «Real» aslida Rodrini sotib olishni istamagan.

«Real» bu kabi darajadagi futbolchilarni shunchaki o‘tkazib yubormaydi. Klub 14 yoshli o‘ng qanot himoyachisini e’tiborsiz qoldirishi mumkindir, ammo bunday miqyosdagi o‘yinchini emas.

«Real» bu transfer uchun bor imkoniyatini ishga solmadi. Endi esa javobgarlikni Rodriga yuklab, go‘yoki u o‘yin uslubi sabab «Barselona»ni tanladi deyishmoqda. Futboldan xabari borlar uchun bu shunchaki bema’ni hazil.

Katta saviyadagi futbolchini sotib olishni chin dildan istaganida, «Real» bunga hamisha erishgan. Luish Figu, Zinedin Zidan, Maykl Ouen, Ronaldo olib kelingan... Shunday ekan, endi hech kim menga Rodri shunchaki boshqa klubda o‘ynashni istagan deb aytmasin», — dedi Moryentes.