AQSHning Sent-Luis shahrida nufuzli “Grand Chess Tour” seriyasining navbatdagi bosqichi — “Saint Louis Rapid & Blitz 2026” turniri o‘z yakuniga yetdi. Musobaqa chempionligi uchun hindistonlik grossmeyster Rameshbabu Praggnanandha hamda o‘zbekistonlik shaxmatchi Javohir Sindorov o‘rtasida keskin kurash kechdi.
Turnirning hal qiluvchi pallasida Sindorov chempionlik uchun kurashni davom ettirish imkoniyatini saqlab qolgan edi. Biroq 17-turda aynan Praggnanandhaga qarshi kechgan markaziy bahs durang bilan yakunlandi. Ushbu natija hindistonlik grossmeysterga musobaqa tugashiga bir tur qolganida chempionlikni muddatidan avval rasmiylashtirish imkonini berdi.
Shu tariqa, Rameshbabu Praggnanandha faoliyatida ilk bor “Saint Louis Rapid & Blitz 2026” turniri bosh sovrinini qo‘lga kiritdi. Ushbu muvaffaqiyat evaziga u 50 ming AQSH dollari mukofot puli hamda“Grand Chess Tour” umumiy reytingi uchun muhim ochkolarga ega bo‘ldi.
O‘zbekistonlik grossmeyster Javohir Sindorov esa musobaqa davomida barqaror va yuqori saviyadagi o‘yini bilan e’tibor qozondi. U turnirni ikkinchi o‘rinda yakunlab, 40 ming AQSH dollari mukofot pulini qo‘lga kiritdi. Sindorov musobaqa davomida Praggnanandhaning eng yaqin ta’qibchisi bo‘lib qoldi va chempionlik uchun kurashni so‘nggi turgacha davom ettirdi.
