«Bavariya» bosh murabbiyi Vensan Kompani Jamal Musiala va Alfonso Devis yangi mavsumda jamoaga katta hissa qo‘shishiga ishonch bildirdi.

Har ikki futbolchi o‘tgan mavsumda jarohatlar sabab qiyin davrni boshdan kechirdi. Musiala og‘ir jarohatdan keyin avvalgi o‘yin ritmini to‘liq tiklay olmagan bo‘lsa, Devis ham xoch boylami jarohatidan keyin turli muammolar tufayli bir necha bor safdan chiqdi.

Kompani esa futbolchilar atrofidagi shubhalarga qo‘shilmasligini ta’kidladi.

«Menimcha, vaziyat boshqacha tus olishi mumkin deb hisoblayotganlar juda ko‘p. Ammo bunday yuqori darajadagi futbolchilar qiyinchiliklardan motivasiya ola bilishini yaxshi bilaman.

Men yigitlarimiz shunday mavsum o‘tkazishini kutyapmanki, bu bizga yanada kuchli bo‘lish imkonini beradi», — dedi Kompani klub matbuot xizmatiga bergan intervyusida.

Belgiyalik murabbiy jamoaning qolgan a’zolaridan ham yuqori talablarni kutmoqda.

«Barcha raqiblarimiz g‘alabaga chanqoq. Bizda hech qanday manmanlikka o‘rin yo‘q. O‘tgan mavsumda nima bo‘lgani endi ahamiyatsiz.

O‘tgan mavsumda nima bo‘lishidan qat’i nazar, bu mavsum siz uchun eng yaxshisi bo‘lishi mumkin. Bizdagi mentalitet ham shunday bo‘lishi kerak», — deya qo‘shimcha qildi Kompani.