"Komo" bosh murabbiyi Sesk Fabregas "Arsenal" stadioniga qaytgani haqida fikr bildirdi. Italiya klubi London jamoasiga qarshi o‘rtoqlik uchrashuvini aynan shu yerda o‘tkazdi.
"Albatta, chinakam baxtli bo‘lgan joyimga qaytish juda yoqimli. Ammo men uchun futbolchilarimning 65 ming muxlis qarshisida qanday o‘ynashi va bunday muhitni qanday yengib o‘tishi yanada qiziqroq.
Biz avvalgidek o‘z futbolimizni o‘ynayotganimizni, xarakter ko‘rsatayotganimizni va nimalarga qodir ekanimizni namoyish eta olishimizni ko‘rmoqchiman", — deya Fabregasning so‘zlarini Football Italia keltirdi.
Ispaniyalik mutaxassisning ta’kidlashicha, bunday darajadagi uchrashuvlar "Komo"ning yosh futbolchilari uchun ayniqsa muhim.
"Bizda juda yosh jamoa bor. Ko‘plab futbolchilarimiz 19 yoki 20 yoshda. Shuning uchun hozir ular uchun eng muhimi — bunday uchrashuvlarda tajriba to‘plash.
Biz jamoamizda sifat va texnika borligini bilamiz. Ammo futbolchilar bunday darajada qanchalik ko‘p o‘yin o‘tkazsa, shunchalik kuchli bo‘lib boradi. Futbolda faqat sifat va texnika emas, muhit va ishtiyoq ham muhim. Ba’zan odamlar bularning qanchalik katta ahamiyatga ega ekanini unutib qo‘yadi", — deya qo‘shimcha qildi Fabregas.
"Komo" ikki yil avval B Seriyada ishtirok etgan edi. O‘tgan mavsumda esa jamoa Italiya chempionatida to‘rtinchi o‘rinni egalladi va Italiya kubogining yarimfinaliga qadar yetib bordi.
Yangi mavsumda "Komo" o‘z tarixida ilk bor Chempionlar ligasida ishtirok etadi.
