"Комо" бош мураббийи Сеск Фабрегас "Арсенал" стадионига қайтгани ҳақида фикр билдирди. Италия клуби Лондон жамоасига қарши ўртоқлик учрашувини айнан шу ерда ўтказди.
"Албатта, чинакам бахтли бўлган жойимга қайтиш жуда ёқимли. Аммо мен учун футболчиларимнинг 65 минг мухлис қаршисида қандай ўйнаши ва бундай муҳитни қандай енгиб ўтиши янада қизиқроқ.
Биз аввалгидек ўз футболимизни ўйнаётганимизни, характер кўрсатаётганимизни ва нималарга қодир эканимизни намойиш эта олишимизни кўрмоқчиман", — дея Фабрегаснинг сўзларини Football Italia келтирди.
Испаниялик мутахассиснинг таъкидлашича, бундай даражадаги учрашувлар "Комо"нинг ёш футболчилари учун айниқса муҳим.
"Бизда жуда ёш жамоа бор. Кўплаб футболчиларимиз 19 ёки 20 ёшда. Шунинг учун ҳозир улар учун энг муҳими — бундай учрашувларда тажриба тўплаш.
Биз жамоамизда сифат ва техника борлигини биламиз. Аммо футболчилар бундай даражада қанчалик кўп ўйин ўтказса, шунчалик кучли бўлиб боради. Футболда фақат сифат ва техника эмас, муҳит ва иштиёқ ҳам муҳим. Баъзан одамлар буларнинг қанчалик катта аҳамиятга эга эканини унутиб қўяди", — дея қўшимча қилди Фабрегас.
"Комо" икки йил аввал Б Серияда иштирок этган эди. Ўтган мавсумда эса жамоа Италия чемпионатида тўртинчи ўринни эгаллади ва Италия кубогининг яримфиналига қадар етиб борди.
Янги мавсумда "Комо" ўз тарихида илк бор Чемпионлар лигасида иштирок этади.
