"Arsenal"ning sobiq futbolchisi, ayni paytda "Komo" bosh murabbiyi Sesk Fabregas "kanonirlar"ning so‘nggi yillardagi muvaffaqiyatlari haqida fikr bildirdi.

O‘tgan mavsumda London klubi 22 yillik tanaffusdan so‘ng ilk bor Angliya Premyer-ligasida chempion bo‘ldi. Shuningdek, "Arsenal" 20 yildan keyin ilk marta Chempionlar ligasi finaliga qadar yetib bordi.

"Bu ajoyib, shunchaki ajoyib. Klubni tabriklayman. Bu loyiha yetti yoki sakkiz yildan buyon qurib kelinmoqda. Agar adashayotgan bo‘lsam, meni to‘g‘rilang, ammo "Arsenal" ketma-ket uch marta sakkizinchi o‘rinni egalladi, keyin esa Chempionlar ligasiga chiqishga juda yaqin keldi. Bu alamli edi.

Ammo klub o‘z rejasi va aniq belgilab olingan maqsadiga sodiq qoldi, rivojlanishda davom etdi. Zamonaviy futbolda aynan shu narsa yetishmayapti. Har kuni deyarli bir xil holatni ko‘rish mumkin: "Uchta o‘yinda mag‘lub bo‘ldik — murabbiyni almashtirish vaqti keldi".

Mikel Arteta ajoyib ishni amalga oshirdi. Men unga faqat eng yaxshi tilaklarni bildirishim mumkin", — deya Fabregasning so‘zlarini jurnalist Konnor Xamm keltirdi.

Chorshanba kuni "Arsenal" va "Komo" o‘rtasida o‘rtoqlik uchrashuvi bo‘lib o‘tdi. Londonliklar penaltilar seriyasida g‘alaba qozondi.