"Арсенал"нинг собиқ футболчиси, айни пайтда "Комо" бош мураббийи Сеск Фабрегас "канонирлар"нинг сўнгги йиллардаги муваффақиятлари ҳақида фикр билдирди.
Ўтган мавсумда Лондон клуби 22 йиллик танаффусдан сўнг илк бор Англия Премьер-лигасида чемпион бўлди. Шунингдек, "Арсенал" 20 йилдан кейин илк марта Чемпионлар лигаси финалига қадар етиб борди.
"Бу ажойиб, шунчаки ажойиб. Клубни табриклайман. Бу лойиҳа етти ёки саккиз йилдан буён қуриб келинмоқда. Агар адашаётган бўлсам, мени тўғриланг, аммо "Арсенал" кетма-кет уч марта саккизинчи ўринни эгаллади, кейин эса Чемпионлар лигасига чиқишга жуда яқин келди. Бу аламли эди.
Аммо клуб ўз режаси ва аниқ белгилаб олинган мақсадига содиқ қолди, ривожланишда давом этди. Замонавий футболда айнан шу нарса етишмаяпти. Ҳар куни деярли бир хил ҳолатни кўриш мумкин: "Учта ўйинда мағлуб бўлдик — мураббийни алмаштириш вақти келди".
Микель Артета ажойиб ишни амалга оширди. Мен унга фақат энг яхши тилакларни билдиришим мумкин", — дея Фабрегаснинг сўзларини журналист Коннор Хамм келтирди.
Чоршанба куни "Арсенал" ва "Комо" ўртасида ўртоқлик учрашуви бўлиб ўтди. Лондонликлар пенальтилар сериясида ғалаба қозонди.
