«Shalke 04» hujumchisi Edin Jeko Bundesliganing bo‘lajak mavsumidan nimalar kutayotgani bilan o‘rtoqlashdi.

Bosnilik veteran Gelzenkirxen jamoasiga yanvarda kelib qo‘shilgan edi, bahorda esa klubga oliy divizionga chiqishda yordam berdi. Hujumchi 15 yil ichida ilk bor Birinchi Bundesligada maydonga tushadi.

«Nimani intiqlik bilan kutyapman? Ehtimol, «Bavariya»ga qarshi o‘yinlarnidir. Ular Kompani qo‘l ostida juda yaxshi o‘yin ko‘rsatishmoqda. Vensan — mening do‘stim va sobiq sardorim. «Bavariya»ga qarshi o‘yinlar nafaqat bizga, balki Bundesliganing sira istisnosiz barcha jamoalariga og‘ir kechadi. Jiddiy aytadigan bo‘lsam, mavsum boshlanishini haqiqatan ham intiqlik bilan kutyapman, axir bu yerda 15 yildan beri o‘ynaganim yo‘q», — dedi 40 yoshli futbolchi Sky Sport nashriga bergan intervyusida.

Eslatib o‘tamiz, Edin Jeko 2007 yildan 2011 yilgacha «Volfsburg» sharafini himoya qilgan, u yerdan «Manchester Siti»ga o‘tgan va aynan o‘sha yerda Myunxen grandining hozirgi bosh murabbiyi bilan birga to‘p surgan.