«Шальке 04» ҳужумчиси Эдин Жеко Бундеслиганинг бўлажак мавсумидан нималар кутаётгани билан ўртоқлашди.

Боснилик ветеран Гельзенкирхен жамоасига январда келиб қўшилган эди, баҳорда эса клубга олий дивизионга чиқишда ёрдам берди. Ҳужумчи 15 йил ичида илк бор Биринчи Бундеслигада майдонга тушади.

«Нимани интиқлик билан кутяпман? Эҳтимол, «Бавария»га қарши ўйинларнидир. Улар Компани қўл остида жуда яхши ўйин кўрсатишмоқда. Венсан — менинг дўстим ва собиқ сардорим. «Бавария»га қарши ўйинлар нафақат бизга, балки Бундеслиганинг сира истисносиз барча жамоаларига оғир кечади. Жиддий айтадиган бўлсам, мавсум бошланишини ҳақиқатан ҳам интиқлик билан кутяпман, ахир бу ерда 15 йилдан бери ўйнаганим йўқ», — деди 40 ёшли футболчи Sky Sport нашрига берган интервьюсида.

Эслатиб ўтамиз, Эдин Жеко 2007 йилдан 2011 йилгача «Вольфсбург» шарафини ҳимоя қилган, у ердан «Манчестер Сити»га ўтган ва айнан ўша ерда Мюнхен грандининг ҳозирги бош мураббийи билан бирга тўп сурган.