«Beshiktosh» prezidenti Serdar Adali klub shu yozda Muhammad Salohning transferini ko‘rib chiqqanini, biroq bosh murabbiy Vinchenso Italyano va uning shtabi bu g‘oyaga ishonmagani sababli kelishuv oxir-oqibat barbod bo‘lganini oshkor qildi.

«Menga Saloh variantini taklif qilishganda, murabbiy va texnik shtabni ko‘ndirish uchun juda katta harakat qildim», — dedi Adali.

«Murabbiy va texnik shtab (Salohni sotib olishga) unchalik ishtiyoq bildirishmadi. Bundan tashqari, ular (Saloh va uning agenti) so‘ragan shartlar klubimiz tamoyillariga mos kelmas edi hamda transfer oynasi boshida belgilab olgan rejalarimizga kirmas edi. Shartlar mos kelmagach, biz ortga chekindik», — deya qo‘shimcha qildi u.

Adali, shuningdek, Salohni sotib olish Italyano tomonidan maxsus so‘ralgan Dushan Vlahovichni jamoaga olib kelish rejalariga ta’sir qilishi mumkinligini tushuntirdi.

«Agar Saloh bilan shartnoma imzolaganimizda, murabbiy xohlagan Vlahovichni olib kela olmagan bo‘lardik. U so‘ragan transferni amalga oshirganimdan juda xursandman», — dedi u.

«Beshiktosh» prezidenti yangi kelib qo‘shilgan futbolchilar Leandro Trossard va Aleksandr Nyubel manziliga ham maqtov so‘zlarini aytdi hamda klub kelajakni qurishdan ko‘ra, joriy mavsumda sovrinlar yutishni maqsad qilganini ta’kidladi.