Londonning «Arsenal» klubi «Galatasaroy» hujumchisi Viktor Osimxenni o‘z safiga qo‘shib olish variantini ko‘rib chiqishda davom etmoqda.
Jurnalist Furkan Bazogluning xabar qilishicha, «kanonirlar» Turkiya Superligasi grandiga xat yuborib, 27 yoshli nigeriyalik futbolchining transferiga qiziqish bildirishgan. Biroq Stambul klubi rahbariyati londonliklardan aniq va rasmiy taklif kutmoqda.
«Galatasaroy» prezidenti Dursun O‘zbek forvard uchun 130 million yevrodan kam bo‘lmagan mablag‘ talab qilmoqda va «Arsenal» ushbu moliyaviy talabdan xabardor.
Ma’lumot uchun, Transfermarkt portali Viktor Osimxenning bozor qiymatini 75 million yevroga baholagan. Uning «Galatasaroy» bilan amaldagi shartnomasi 2029 yilgacha mo‘ljallangan.
