"Real Sosyedad" "Barselona" himoyachisi Ektor Fortni o‘z safiga qo‘shib olish imkoniyatini o‘rganmoqda.

Insayder Matteo Moretto ma’lumotiga ko‘ra, San-Sebastyan klubi 20 yoshli futbolchining ehtimoliy transferi yuzasidan so‘rov yuborgan. Shu tariqa, basklar Fort uchun kurashga qo‘shildi.

Katta iqtidor egasi sifatida baholanayotgan futbolchi hozircha "Barselona" bosh murabbiyi Xansi Flikning asosiy rejalaridan o‘rin olmagan. Manbaga ko‘ra, murabbiylar shtabi uning o‘rniga Xavi Espartga ko‘proq ishonch bildirishga qaror qilgan.

Fortni qo‘lga kiritish uchun asosiy da’vogarlardan biri "Borussiya Dortmund" bo‘lib turibdi. Germaniya klubi futbolchining transferi bo‘yicha "Barselona" bilan muzokaralarni boshlagani haqida ham xabarlar tarqalgan. Ayrim ma’lumotlarga ko‘ra, kataloniyaliklar Fort uchun kamida 20 mln yevro olishni istamoqda.

Ektor Fort o‘tgan mavsumni ijara asosida "Elche" tarkibida o‘tkazdi. Ispaniyalik himoyachi La Ligada 14 ta uchrashuvda ishtirok etib, 2 ta gol urdi va 2 ta golli uzatma amalga oshirdi. Shuningdek, Ispaniya kubogida 3 ta o‘yinda maydonga tushib, bir marta raqib darvozasini ishg‘ol qildi. Mavsum davomida yelkasidan olgan jarohati uning muntazam o‘yin amaliyotiga ega bo‘lishiga to‘sqinlik qildi.

Fort "Barselona" akademiyasi tarbiyalanuvchisi hisoblanadi. U 2006 yil 2 avgustda tug‘ilgan va asosan o‘ng qanot himoyachisi sifatida harakat qiladi. Futbolchining kataloniyaliklar bilan amaldagi shartnomasi 2029 yilning 30 iyuniga qadar mo‘ljallangan. Transfermarkt portali uning bozor qiymatini 12 mln yevroga baholamoqda.

Ayni paytda Fort va uning agenti kelib tushayotgan takliflarni o‘rganib chiqmoqda. Futbolchining asosiy maqsadi — muntazam o‘yin amaliyotiga ega bo‘ladigan va keyingi rivojlanishi uchun qulay sharoit yaratadigan klubni tanlash. "Real Sosyedad"ning kurashga qo‘shilishi esa yosh himoyachining kelajagi borasidagi raqobatni yanada oshirishi mumkin.