«Manchester Yunayted»ning sobiq futbolchisi Pol Skoulz yo‘l harakati qoidalarini buzgani — tezlikni oshirgani uchun haydovchilik guvohnomasidan mahrum etildi. Skoulz Range Rover avtomobilini boshqarayotganda o‘tgan yilning noyabr oyida va joriy yilning mart oyida tezlikni oshirgani sababli ikki marta aybdor deb topildi.
Sobiq Angliya terma jamoasi a’zosi 6 oyga haydovchilik huquqidan mahrum qilindi. Shuningdek, unga 1472 funt sterling miqdorida jarima va sud xarajatlarini to‘lash majburiyati yuklandi. Bu haqda The Telegraph nashri xabar bermoqda.
Pol Skoulz butun faoliyatini «Manchester Yunayted»da o‘tkazgan. Yarim himoyachi «qizil iblislar» safida 717 ta o‘yinda maydonga tushib, 155 ta gol urgan va 84 ta golli uzatmaga mualliflik qilgan.
