«Shtutgart» va Germaniya milliy jamoasi hujumchisi Deniz Undav dengiz mahsulotlariga kuchli allergiyasi borligini ma’lum qildi. Futbolchining aytishicha, u allergik reaksiya tufayli ikki marta hayotini yo‘qotish arafasida qolgan.

«Menga krevetka yeyish mumkin emas. Ikki marta kuchli allergik reaksiya bo‘lgan va har ikki safar o‘lib qolay deganman. Hamma joyim shishib ketadi va nafas ololmay qolaman. Ilgari o‘zim ham bunday holat haqida eshitmagan edim», — dedi Undav HSTRYSTORIES YouTube kanaliga bergan intervyusida.

30 yoshli nemis hujumchisining aytishicha, uning sevimli taomlari orasida kurdcha uslubda tayyorlanadigan guruchli dimlama go‘sht — Goşt û Birinc hamda guruch solib o‘ralgan uzum barglari — Pel bor. Shuningdek, futbolchi lahmajun va doner kabobni ham xush ko‘radi.

Undav achchiq taomlarni juda yaxshi ko‘rishini ham yashirmadi. Hujumchining so‘zlariga ko‘ra, u bir safar achchiqlik darajasi 3 million Skovillga teng bo‘lgan doner kabobni yegan.

21 avgust, juma kuni «Shtutgart» Germaniya kubogining birinchi bosqichida «Ganza» mehmoni bo‘ladi. Uchrashuv Toshkent vaqti bilan 23:45 da boshlanadi.