«Barselona» yarim himoyachisi Frenki de Yong joriy yozda klubni tark etishi mumkin. Bu haqda Sport nashri xabar berdi.

Manba ma’lumotiga ko‘ra, niderlandiyalik futbolchi atrofidagi vaziyat uning tizzasidan olgan jarohati sabab yana murakkablashgan. De Yong jarrohlik amaliyotini o‘tkazish o‘rniga konservativ davolanish usulini tanlagan.

29 yoshli yarim himoyachiga xorij klublari allaqachon qiziqish bildirmoqda. Uning ehtimoliy xaridorlari qatorida Turinning «Yuventus» klubi ham tilga olingan.

«Barselona» De Yongni mavsum oxiriga qadar keyinchalik sotib olish huquqi bilan ijaraga berish variantini ham ko‘rib chiqishi mumkin.

Manbaga ko‘ra, bunday kelishuv kataloniyaliklarga futbolchining yuqori maoshi bilan bog‘liq xarajatlarni qisman kamaytirish va tarkibni kuchaytirish uchun qo‘shimcha mablag‘ ajratish imkonini beradi.

O‘tgan mavsumda De Yong barcha musobaqalar doirasida 38 ta uchrashuvda maydonga tushib, 1 ta gol urdi va 8 ta golli uzatmani amalga oshirdi.