«Arsenal» hujumchisi Gabriel Jezusga Angliya Premyer-ligasining ikki klubi qiziqish bildirmoqda. AS ma’lumotiga ko‘ra, «Everton» va «Ipsvich» 29 yoshli braziliyalik futbolchini o‘z safiga qo‘shib olish imkoniyatini ko‘rib chiqmoqda.

Har ikki klub Jezusning ehtimoliy transferi bo‘yicha «Arsenal» bilan allaqachon bog‘langan. Futbolchining o‘zi ham faoliyatini Angliyada davom ettirishni afzal ko‘rmoqda.

Jezus ko‘proq o‘yin amaliyotiga ega bo‘lishni istaydi. U «Arsenal»ning joriy mavsumdagi ilk rasmiy uchrashuvi — «Manchester Siti»ga qarshi Angliya Superkubogi bahsi uchun qaydnomaga kiritilmadi. «Kanonirlar» ushbu uchrashuvda 0:3 hisobida mag‘lub bo‘ldi.

Braziliyalik hujumchiga «Napoli» ham qiziqish bildirgandi. Italiya klubi Romelu Lukakuning «Fenerbaxche»ga ketishidan so‘ng yangi hujumchi izlamoqda. Biroq xabarlarga ko‘ra, Jezus bo‘yicha muzokaralar natijasiz yakunlangan.

Gabriel Jezusning «Arsenal» bilan amaldagi shartnomasi 2027 yil iyuniga qadar mo‘ljallangan. Transfermarkt uning bozor qiymatini 17 million yevroga baholamoqda. Avvalroq London klubi hujumchisi uchun kamida 20 million yevro talab qilayotgani xabar qilingandi.

«Arsenal» Jezusni 2022 yil yozida «Manchester Siti»dan 52 million yevro evaziga sotib olgan. Braziliyalik futbolchi «kanonirlar» safida hozirgacha 123 ta uchrashuvda 38 ta gol urgan va 12 ta golli uzatmani amalga oshirgan.