Portugaliyalik himoyachi Joau Kanselu faoliyatini «Barselona»da davom ettiradi.

31 yoshli futbolchi o‘tgan mavsumning ikkinchi qismini ham kataloniyaliklar safida ijara asosida o‘tkazgan edi. Endi esa u «Al-Hilol» bilan shartnomasini bekor qilib, «Barselona»ga erkin agent sifatida qo‘shildi. Ispaniya matbuoti ma’lumotiga ko‘ra, tomonlar uch yillik shartnoma bo‘yicha kelishuvga erishgan.

Kanseluning «Barselona»ga qaytish istagi transferda muhim omil bo‘ldi. Portugaliyalik futbolchi kataloniyaliklar bilan kelishuvga erishish uchun moliyaviy jihatdan yon berishga ham tayyor bo‘lgan. Bosh murabbiy Hansi Flik ham uni jamoada saqlab qolish tarafdori edi.

Kanselu uchun bu «Barselona»dagi uchinchi davr bo‘ladi. U ilk bor 2023/24 yilgi mavsumda «Manchester Siti»dan ijaraga kelib, barcha musobaqalarda 42 ta o‘yinda qatnashgan va 4 ta gol urgan. 2024 yil yozida esa «Al-Hilol»ga to‘liq transfer qilingan.

2026 yil yanvarda «Barselona» Kanseluni Saudiya Arabistoni klubidan mavsum oxiriga qadar yana ijaraga oldi. Portugaliyalik himoyachi jamoa bilan Ispaniya chempionligini qo‘lga kiritdi.

Kanselu himoyaning har ikki qanotida harakat qila olishi bilan ajralib turadi. Uning universalligi va hujumlarni qo‘llab-quvvatlashdagi imkoniyatlari Flik uchun qo‘shimcha variant taqdim etadi.