Amsterdamning «Ayaks» klubi Noa Langni o‘z safiga qo‘shib olish g‘oyasidan butunlay voz kechdi. Ayni paytda futbolchining kelajagi uchun eng real variant «Atalanta» bo‘lib turibdi. Bu haqda transferlar bo‘yicha taniqli italiyalik jurnalist Janluka Di Marsio xabar berdi.

Manba ma’lumotiga ko‘ra, «Napoli» transfer bozorida Langning ehtimoliy ketishi bilan bog‘liq masala ustida ishlashda davom etmoqda. Bergamoliklar esa futbolchiga eng jiddiy qiziqish bildirayotgan klub hisoblanadi.

«Napoli» uchun transfer bozorida Noa Langning ehtimoliy ketishi asosiy masalalardan biri bo‘lib qolmoqda. «Ayaks» kurashdan chiqdi. Shunga qaramay, futbolchi hali ham «Atalanta»ning diqqat markazida. Bergamoliklar klubi Langning kelajagi uchun eng real variant bo‘lib turibdi», — dedi Di Marsio.

Avvalroq Langning «Galatasaroy»ga o‘tish varianti ham mavjud edi. Biroq xabarlarga ko‘ra, turk klubi Aleksey Batrakov transferi ustida ish olib borayotgani sabab Langga bo‘lgan qiziqishidan ham voz kechgan.