«Aston Villa» «Arsenal»ga o‘tish arafasida turgan Ezri Konsaning o‘rniga yangi markaziy himoyachi izlamoqda. Sky Sports ma’lumotiga ko‘ra, birmingemliklarning asosiy nomzodlaridan biri — «Milan» futbolchisi Fikayo Tomori.

Manbaga ko‘ra, «Arsenal» Konsa transferi bo‘yicha «Aston Villa» bilan 51 million funtlik kelishuvga erishgan. Shu sababli klub uning o‘rnini to‘ldirish uchun transfer bozorida ish olib bormoqda.

28 yoshli Tomori «Aston Villa»ning markaziy himoya chizig‘ini kuchaytirish uchun ko‘rib chiqilayotgan futbolchilar ro‘yxatiga kiritilgan.

Shuningdek, «Aston Villa» «Sautgempton» himoyachisi Teylor Xarvud-Bellisni ham xarid qilishga uringan. Biroq Chempionship klubi futbolchi uchun yuborilgan taklifni rad etgan. Sky Sports ham «Sautgempton» birmingemliklarning taklifini qabul qilmaganini tasdiqlamoqda.

Ma’lumotlarga ko‘ra, «Aston Villa» 24 yoshli Xarvud-Bellis uchun taxminan 18 million funt taklif qilgan.