Ispaniya La Ligasida joriy mavsumdan boshlab hakamlar o‘yinlar oldidan va uchrashuvlardan keyin intervyu berib, o‘z qarorlariga izoh berib boradi.
Biroq "Real Madrid"ning uy uchrashuvlari o‘tkaziladigan "Santyago Bernabeu" stadionida mazkur tartib amal qilmaydi.
Mundo Deportivo va SPORT nashrlari ma’lumotiga ko‘ra, bunga "Real Madrid" tomonidan translyasiya huquqi egalari uchun joriy etilgan cheklovlar sabab bo‘lgan. Shu tufayli "Bernabeu"dagi o‘yinlarda hakamlar uchrashuvdan oldin va keyin telekameralar qarshisida o‘z qarorlarini sharhlamaydi.
Shu tariqa, La Ligadagi 20 ta stadion orasida faqat "Santyago Bernabeu" liganing hakamlar faoliyatida shaffoflikni oshirishga qaratilgan yangi protokolidan chetda qoldi.
Qolgan barcha stadionlarda esa hakamlar o‘yindan oldin va keyin intervyu berib, muhim qarorlari yuzasidan tushuntirish berishlari mumkin bo‘ladi.
