Испания Ла Лигасида жорий мавсумдан бошлаб ҳакамлар ўйинлар олдидан ва учрашувлардан кейин интервью бериб, ўз қарорларига изоҳ бериб боради.

Бироқ "Реал Мадрид"нинг уй учрашувлари ўтказиладиган "Сантьяго Бернабеу" стадионида мазкур тартиб амал қилмайди.

Mundo Deportivo ва SPORT нашрлари маълумотига кўра, бунга "Реал Мадрид" томонидан трансляция ҳуқуқи эгалари учун жорий этилган чекловлар сабаб бўлган. Шу туфайли "Бернабеу"даги ўйинларда ҳакамлар учрашувдан олдин ва кейин телекамералар қаршисида ўз қарорларини шарҳламайди.

Шу тариқа, Ла Лигадаги 20 та стадион орасида фақат "Сантьяго Бернабеу" лиганинг ҳакамлар фаолиятида шаффофликни оширишга қаратилган янги протоколидан четда қолди.

Қолган барча стадионларда эса ҳакамлар ўйиндан олдин ва кейин интервью бериб, муҳим қарорлари юзасидан тушунтириш беришлари мумкин бўлади.