"Barselona" "Fenerbaxche" darvozaboni Dominik Livakovichni transfer qilish bo‘yicha turk klubi bilan kelishuvga erishdi.

Sport nashri ma’lumotiga ko‘ra, "Fenerbaxche" kataloniyaliklarning taklifini qabul qilgan. Endi tomonlar zarur hujjatlarni rasmiylashtirib, transferni yakunlashi kerak. So‘nggi ma’lumotlarga ko‘ra, kelishuv 2 million yevro kafolatlangan to‘lov va yana 2 million yevro bonuslarni o‘z ichiga oladi.

Biroq 31 yoshli xorvatiyalik darvozabon transfer amalga oshishi bilan "Barselona" safida o‘ynay boshlamaydi. Kataloniya klubi uni bir mavsumga ijaraga berishni va 2027 yil yozida jamoaga qaytarishni rejalashtirmoqda.

"Barselona" Livakovichni kelajakda Voysex Shchensnining o‘rnini egallashi mumkin bo‘lgan darvozabon sifatida ko‘rmoqda. Rejaga ko‘ra, xorvatiyalik futbolchi Joan Garsiya bilan birga jamoaning darvozabonlar chizig‘ini shakllantiradi.