«Atletiko» hujumchisi Xulian Alvaresning kelajagi borasida yangi ma’lumotlar paydo bo‘ldi. Argentinalik futbolchi faoliyatini faqat «Barselona»da davom ettirishni xohlamoqda.

Marca ma’lumotiga ko‘ra, 26 yoshli forvard boshqa klublarni variant sifatida ko‘rib chiqmayapti.

«Na «Arsenal», na boshqa biror klub Alvares uchun variant hisoblanadi», — deya ta’kidlangan futbolchiga yaqin manbalarga tayanib berilgan xabarda.

So‘nggi kunlardagi boshqa xabarlar ham Alvaresning ustuvor maqsadi «Barselona» ekanini tasdiqlamoqda. Shu bilan birga, «Atletiko»ning pozisiyasi qat’iy — madridliklar hujumchini to‘g‘ridan-to‘g‘ri raqobatchisiga sotishni istamayapti.

«Barselona» esa transferdan hali to‘liq voz kechmagan. Kataloniya klubi yaqin kunlarda kelishuvga erishish imkoniyati bor-yo‘qligini aniqlashni rejalashtirgan. Alvaresning «Atletiko» bilan shartnomasi 2030 yil yozigacha amal qiladi.

Agar klublar o‘rtasida kelishuvga erishilmasa, argentinalik hujumchi 2026/27 yilgi mavsumni «Atletiko» safida o‘tkazishi kutilmoqda.