Ekspert hakamlar guruhi Superliga 18-turidan o‘rin olgan "Paxtakor" – "Surxon" uchrashuvidagi bahsli vaziyat bo‘yicha xulosasini e’lon qildi. Uchrashuv 0:0 hisobida yakunlangan, VAR hakami sifatida Ravshan Abduvohidov ishlagan.

90+4-daqiqada "Paxtakor" tomonidan kiritilgan gol VAR tekshiruvidan keyin bosh hakam tomonidan bekor qilingan.

Ekspert hakamlar guruhi xulosasiga ko‘ra, ushbu epizodda VAR hakami xatoga yo‘l qo‘ygan. Xususan, Ravshan Abduvohidov bosh hakamni vaziyatni monitor orqali shaxsan qayta ko‘rib chiqishga chaqirmagan va shu tariqa VAR protokoli talablarini buzgan.

Natijada bosh hakam epizodni monitorda ko‘rmasdan, VAR hakami bergan ma’lumot asosida golni bekor qilgan.

VAR protokoli talablarini buzgani inobatga olinib, Ravshan Abduvohidov mavsum yakuniga qadar VAR hakami sifatida ishlashdan chetlatildi.