"Paxtakor" futbol klubi Superliga 18-turida "Surxon"ga qarshi o‘yindagi hakamlik yuzasidan rasmiy e’tiroz bildirdi.

Uchrashuvning 90+3-daqiqasida Hojimat Erkinov tomonidan kiritilgan gol VAR aralashuvidan so‘ng bekor qilingan. "Paxtakor"ning ta’kidlashicha, klub kamerasidan olingan tasvirlarda ofsayd holati mavjud emas.

Klub, shuningdek, bahsli epizodda VAR protokoli to‘g‘ri qo‘llanilganiga shubha bildirgan. Bayonotda qayd etilishicha, ehtimoliy ofsayd holatidagi futbolchi to‘pga bevosita o‘ynamagan, "Surxon" darvozaboni esa to‘pni qarshiliksiz qabul qilib, uni tepib yuborish vaqtida xatoga yo‘l qo‘ygan.

"Paxtakor" ushbu vaziyatda bosh hakam epizodni monitor orqali shaxsan ko‘rib chiqishi lozim bo‘lganini ta’kidladi.

Klub VAR xonasidagi muloqot audioyozuvlarini e’lon qilishni talab qilib, O‘zFHM va PFLdan vaziyatga oydinlik kiritishni so‘radi.

"O‘zbek futbolida adolat, ochiqlik va shaffoflikni istasak, har bir o‘yinda muhokamalarga sabab bo‘lgan holatlarning audioyozuvlari ochiqchasiga taqdim etilsin", — deyiladi klub bayonotida.

"Paxtakor" hakamlar tayinloviga ham e’tiroz bildirgan. Xususan, klub 5 yilga futboldan chetlatilgan Jasur Muxtorov hakamlikka qaytganidan keyin qisqa vaqt ichida ko‘plab uchrashuvlarga bosh hakam sifatida tayinlanganiga e’tibor qaratgan.

Shuningdek, VAR hakami Ravshan Abduvohidovning qarori ham tanqid qilinib, klub bu xato tufayli muhim ochkolardan mahrum bo‘lganini ta’kidlagan.

"Paxtakor" mas’ul tashkilotlarni hakamlarning faoliyati va saviyasini tahlil qilib, vaziyat yuzasidan ochiq bayonot berishga chaqirdi.