"Пахтакор" футбол клуби Суперлига 18-турида "Сурхон"га қарши ўйиндаги ҳакамлик юзасидан расмий эътироз билдирди.

Учрашувнинг 90+3-дақиқасида Ҳожимат Эркинов томонидан киритилган гол VAR аралашувидан сўнг бекор қилинган. "Пахтакор"нинг таъкидлашича, клуб камерасидан олинган тасвирларда офсайд ҳолати мавжуд эмас.

Клуб, шунингдек, баҳсли эпизодда VAR протоколи тўғри қўлланилганига шубҳа билдирган. Баёнотда қайд этилишича, эҳтимолий офсайд ҳолатидаги футболчи тўпга бевосита ўйнамаган, "Сурхон" дарвозабони эса тўпни қаршиликсиз қабул қилиб, уни тепиб юбориш вақтида хатога йўл қўйган.

"Пахтакор" ушбу вазиятда бош ҳакам эпизодни монитор орқали шахсан кўриб чиқиши лозим бўлганини таъкидлади.

Клуб VAR хонасидаги мулоқот аудиоёзувларини эълон қилишни талаб қилиб, ЎзФҲМ ва ПФЛдан вазиятга ойдинлик киритишни сўради.

"Ўзбек футболида адолат, очиқлик ва шаффофликни истасак, ҳар бир ўйинда муҳокамаларга сабаб бўлган ҳолатларнинг аудиоёзувлари очиқчасига тақдим этилсин", — дейилади клуб баёнотида.

"Пахтакор" ҳакамлар тайинловига ҳам эътироз билдирган. Хусусан, клуб 5 йилга футболдан четлатилган Жасур Мухторов ҳакамликка қайтганидан кейин қисқа вақт ичида кўплаб учрашувларга бош ҳакам сифатида тайинланганига эътибор қаратган.

Шунингдек, VAR ҳаками Равшан Абдувоҳидовнинг қарори ҳам танқид қилиниб, клуб бу хато туфайли муҳим очколардан маҳрум бўлганини таъкидлаган.

"Пахтакор" масъул ташкилотларни ҳакамларнинг фаолияти ва савиясини таҳлил қилиб, вазият юзасидан очиқ баёнот беришга чақирди.