"Santos"da "Neymar effekti" asta-sekin o‘z kuchini yo‘qotayotganga o‘xshaydi.

UOL ma’lumotiga ko‘ra, so‘nggi haftalarda klub birdaniga beshta homiy — Pley By Ney, EQR, Nissei, Álamo va Corpx bilan hamkorlikni yo‘qotdi. Bu "Santos" byudjetiga yiliga taxminan 20 million real zarar keltirishi mumkin. Ayni paytda klub libosida homiylar uchun mo‘ljallangan beshta joy bo‘sh turibdi.

Neymar qaytganidan keyin klub muxlislar dasturi a’zolari sonini 100 ming nafarga yetkazishni rejalashtirgandi. Ko‘rsatkich bir paytlar 70 minggacha ko‘tarilgan bo‘lsa, hozir 50 ming atrofiga tushib qolgan.

Shu bilan birga, "Santos" BaladApp bilan 12 oylik yangi homiylik shartnomasini imzoladi. Kelishuv qiymati taxminan 15 million realni tashkil etadi.