"Сантос"да "Неймар эффекти" аста-секин ўз кучини йўқотаётганга ўхшайди.
UOL маълумотига кўра, сўнгги ҳафталарда клуб бирданига бешта ҳомий — Pley By Ney, EQR, Nissei, Álamo ва Corpx билан ҳамкорликни йўқотди. Бу "Сантос" бюджетига йилига тахминан 20 миллион реал зарар келтириши мумкин. Айни пайтда клуб либосида ҳомийлар учун мўлжалланган бешта жой бўш турибди.
Неймар қайтганидан кейин клуб мухлислар дастури аъзолари сонини 100 минг нафарга етказишни режалаштирганди. Кўрсаткич бир пайтлар 70 минггача кўтарилган бўлса, ҳозир 50 минг атрофига тушиб қолган.
Шу билан бирга, "Сантос" BaladApp билан 12 ойлик янги ҳомийлик шартномасини имзолади. Келишув қиймати тахминан 15 миллион реални ташкил этади.
