Мадриднинг «Реал» клуби ёзги трансферлар ойнасида Николас Пасни ўз сафига қайтаришни режалаштирган, бироқ аргентиналик ярим ҳимоячи Италиянинг «Комо» жамоасида қолишни афзал кўрган.

Таниқли инсайдер Фабрицио Романо футболчининг бундай қарорга келиши сабабларини маълум қилди.

Унинг сўзларига кўра, «Реал» ўтган ёзда Пасни 9 миллион еврога қайта сотиб олиш ҳуқуқидан фойдаланмоқчи бўлган. Аммо футболчи Мадридга қайтиш таклифини рад этгач, «қаймоқранглилар» унга тегишли барча ҳуқуқларни 60 миллион евро эвазига «Комо»га сотган.

Романонинг таъкидлашича, Пас ҳали ҳам «Реал»га меҳр қўяди ва келажакда ушбу клубга қайтиш имкониятини инкор этмайди. Бироқ у фаолиятининг ҳозирги босқичида ривожланишни давом эттириш учун мунтазам ўйин амалиётига эга бўлишни муҳим деб ҳисоблаган. Шу сабабли аргентиналик футболчи «Комо»да қолишга қарор қилган.

Яқинда Николас Пас Чемпионлар лигасида «Манчестер Юнайтед»га қарши учрашувда ёрқин ўйин намойиш этди. У 4:1 ҳисобида якунланган баҳсда иккита гол уриб, яна битта голли узатмани амалга оширди.

Қайд этиш жоиз, «Реал» ҳали ҳам аргентиналик иқтидорли футболчини 80 миллион евро эвазига биринчи бўлиб қайта сотиб олиш ҳуқуқига эга.