Ispaniyaning «Valensiya» klubi o‘zining afsonaviy uy stadioni — «Mestalya» bilan xayrlashmoqda. Jamoa mazkur arenadagi so‘nggi mavsumini o‘tkazyapti. Joriy yilda stadion ochilganiga roppa-rosa 100 yil to‘ldi.

Shanba oqshomida «Valensiya» «Mestalya»dagi so‘nggi 19 ta uchrashuvining birinchisini o‘tkazdi. Vigoning «Selta» klubiga qarshi kechgan bahs 0:0 hisobida yakunlandi. Bu Ispaniya chempionatida kamdan kam uchraydigan natijalardan biridir.

Marca ma’lumotiga ko‘ra, «Valensiya» muxlislari «Mestalya» bilan xayrlashuv mavsumiga katta qiziqish bildirmoqda. Joriy mavsumda sotilgan abonementlar soni bo‘yicha klub rekordi yangilandi — ko‘rsatkich allaqachon 40 mingdan oshdi.

Endi «ko‘rshapalaklar»ning o‘zi ham chempionat masofasini munosib tarzda «uchib o‘tishi» kerak.