"Aston Villa" yarim himoyachisi Joao Gomes Angliya Premyer-ligasidagi debyut uchrashuvida qizil kartochka olib, o‘ziga xos antirekordlar ro‘yxatiga kirdi.

23 avgust kuni APLning yangi mavsumi 1-turida "Aston Villa" o‘z maydonida "Brayton"ga 0:4 hisobida mag‘lub bo‘ldi. Birmingemliklarning yangi futbolchisi Gomes 40-daqiqada maydondan chetlatildi.

Transfermarkt 2000/01 yilgi mavsumdan buyon yuritib kelayotgan statistikaga ko‘ra, Gomes APLdagi debyut uchrashuvida eng tez qizil kartochka olgan futbolchilar orasida 7-o‘rinni egalladi.

Ro‘yxatda birinchi o‘rin "Manchester Siti" sobiq futbolchisi Kristian Neguaiga tegishli. U 2004/05 yilgi mavsumda APLdagi debyut o‘yinining 3-daqiqasidayoq maydondan chetlatilgan. Keyingi o‘rinlarni "Everton" futbolchisi Ien Tyorner (9-daqiqa), "Blekbern" vakili Stiven Reyd (12) va "Sanderlend" futbolchisi Jek Kolbek (13) egallab turibdi.

Gomes esa 40-daqiqadagi chetlatilishi bilan ushbu ro‘yxatda 7-pog‘onadan joy oldi. Qizig‘i, "Chelsi"dagi debyut o‘yinida 58-daqiqada qizil kartochka olgan Joau Felish ham kuchli o‘nlikka kirgan.

"Aston Villa" Joao Gomesni yozgi transfer oynasida "Vulverxempton"dan 40 million yevro evaziga xarid qilgan. Shunday qilib, braziliyalik futbolchining yangi klubdagi ilk rasmiy uchrashuvi omadsiz yakunlandi.