«Aston Villa» senegallik futbolchini transfer qilishga qat’iy bel bog‘lagan.

«Chelsi» hujumchisi Nikolas Jekson «Aston Villa»ga o‘tishga yaqin.

25 yoshli forvardni transfer qilish bo‘yicha muzokaralar oldinga siljigan, ammo yakuniy kelishuv hali imzolanmagan. Bitim qiymati 60–70 million yevroni tashkil etishi kutilmoqda.

Jeksonga birmingemliklar bosh murabbiyi Unai Emeri qiziqish bildirmoqda. U avval senegallik futbolchi bilan «Vilyarreal»da birga ishlagan.

Shuningdek, Jeksonga «Atletiko» ham qiziqish bildirgan edi, ammo Madrid klubi futbolchini ijaraga olishni rejalashtirgani, «Chelsi» esa to‘liq transferni talab qilgani sababli muzokaralar to‘xtab qoldi.

O‘tgan mavsum Jekson «Bavariya»da ijara asosida o‘tkazdi. U Myunxen klubi safida barcha turnirlarda 34 ta o‘yinda ishtirok etib, 11 ta gol va 4 ta golli uzatma qayd etdi. Yozda hujumchi Senegal terma jamoasi tarkibida 2026 yilgi Jahon chempionatida 4 ta uchrashuv o‘tkazib, 1 ta golli uzatma amalga oshirdi.

«Aston Villa» APLning birinchi turida «Brayton»ga 0:4 hisobida mag‘lub bo‘ldi. Unai Emeri jamoasi keyingi o‘yinda 31 avgust kuni o‘z maydonida «Arsenal»ni qabul qiladi.