Bir oy avval Moskvaning «Spartak» jamoasi Italiyaning «Torino» klubi serbiyalik futbolchisi Ivan Ilichga qiziqish bildirgan edi. Endi esa yarim himoyachi klubini almashtiradi, ammo Italiya chempionatida qoladi. Ilich faoliyatini «Lechche»da davom ettiradi.
Gap bir mavsumga mo‘ljallangan ijara shartnomasi haqida ketmoqda. Ijara bitimi rasmiylashtirilishidan oldin «Torino» Ilich bilan shartnomani uzaytirdi. Yangi kelishuvga ko‘ra, futbolchi 2028 yilgacha turinliklar tasarrufida qoladi.
Serbiyalik futbolchi 2022 yildan buyon «Torino» sharafini himoya qilib kelayotgan edi. U bundan avval Italiyaning yana bir klubi — «Verona»da ham to‘p surgan.
«Lechche» matbuot xizmati ma’lum qilishicha, Ivan Ilich yangi jamoasida 20-raqam ostida harakat qiladi.
