«Barselona» La Liga doirasida Bilbaoning «Atletik» klubini 2:0 hisobida mag‘lub etdi. Hans-Diter Flik jamoasiga uch ochkoni Rafinya Dias va Fermin Lopesning gollari keltirdi. Ular mos ravishda 37 va 82-daqiqalarda raqib darvozasini ishg‘ol qildi.
Kataloniyaliklar uchrashuv davomida barcha asosiy ko‘rsatkichlar bo‘yicha ustunlik qildi. Shunga qaramay, bahsning eng yaxshi futbolchisi mehmonlar darvozaboni Unai Simon deb topildi.
Unai Simon sakkizta zarbani qaytardi va xG bo‘yicha qariyb ikki golning oldini oldi — uning bu ko‘rsatkichi 1,69 ni tashkil etdi. Darvozabonning ishonchli harakatlarisiz basklar yirik hisobda mag‘lub bo‘lishi ham mumkin edi.
«Barselona» ikki o‘yindan so‘ng 6 ochko bilan La Liga turnir jadvalida peshqadamlik qilmoqda. «Atletik» esa hali ochko jamg‘ara olmagan va so‘nggi o‘rinda bormoqda.
