«Liverpul» bosh murabbiyi Andoni Iraola 2026/2027 yilgi mavsum Chempionlar ligasi umumiy bosqichi qur’asi yakunlari haqida fikr bildirdi.

«Bu qiziqarli va murakkab qur’a bo‘ldi, ammo har qanday holatda ham kuchli raqiblarga qarshi o‘ynashimizni oldindan bilardik. Aynan shunday bo‘ldi.

Chempionlar ligasining kuchi ham shunda, shuning uchun ushbu turnirda ishtirok etish jiddiy sinov hisoblanadi. Bu o‘yinlarning har biri o‘ziga xos tarzda murakkab bo‘ladi. Shuning uchun biz ularga imkon qadar puxta tayyorgarlik ko‘rishimiz va maydonda bor kuchimizni berishimiz kerak.

Biz tayyor turishimiz muhim, ammo bunga qadar Premyer-ligada ikkita muhim o‘yin bizni kutmoqda. Hozir butun e’tiborimiz shu uchrashuvlarga qaratilgan, shundan so‘ng Chempionlar ligasiga diqqatimizni ko‘chiramiz.

Ammo bu chaqiriqni albatta intiqlik bilan kutyapmiz. Muxlislarimiz uchun ham bu juda qiziq: bizni “Enfild”dagi Yevropa kechalari, shuningdek, Italiya, Belgiya, Avstriya va Turkiyadagi stadionlarga safarlar kutmoqda.

Bu yerga kelganimdayoq Chempionlar ligasi “Liverpul” uchun qanchalik alohida ahamiyatga ega ekanini va klub tarixida qanday muhim o‘rin tutishini darhol angladim. Shuning uchun men va murabbiylar shtabi uchun bu turnirda jamoa bilan ishlash katta sharaf bo‘ladi», — deya Iraolaning so‘zlarini klub rasmiy sayti keltirmoqda.

«Liverpul» Chempionlar ligasi 2026/2027 yilgi mavsumi umumiy bosqichida «Atletiko Madrid», «Portu», «Vilyarreal», «Lans», «Inter», «Bryugge», «Fenerbaxche» va LASKka qarshi o‘ynaydi.